दि. 15 ऑगस्ट 2026
MEDIA VNI
मीडिया वी.एन.आय :
गडचिरोली : वनसंपदा, जलसंपदा, खनिजसंपत्ती, जैवविविधता, आदिवासी संस्कृती आणि मुबलक नैसर्गिक संसाधने लाभलेल्या गडचिरोली जिल्ह्याच्या सर्वांगीण विकासाला आता ठोस दिशा देण्याचा प्रयत्न सुरू झाला आहे. उपलब्ध संसाधनांचा स्थानिक नागरिकांच्या आर्थिक व सामाजिक विकासासाठी अपेक्षित प्रमाणात उपयोग झालेला नाही. त्यामुळे उपलब्ध संपत्तीचे रूपांतर विकासात करून गडचिरोलीला विकसित व आत्मनिर्भर जिल्हा बनविण्यासाठी ‘व्हिजन २०४७ गडचिरोली’ हा उपक्रम राबविण्यात येणार असल्याची माहिती माजी आमदार डॉ. देवराव होळी यांनी पत्रकार परिषदेत दिली.
या उपक्रमाच्या माध्यमातून गडचिरोलीच्या दीर्घकालीन विकासाचा रोडमॅप तयार करण्यासाठी १६ व १७ ऑगस्ट रोजी आरमोरी मार्गावरील आर. के. सेलिब्रेशन हॉलमध्ये सर्वपक्षीय लोकप्रतिनिधी, स्वयंसेवी संस्था, सामाजिक कार्यकर्ते, तज्ज्ञ, अभ्यासू नागरिक आणि समाजातील विविध घटकांची व्यापक चर्चा आयोजित करण्यात आली आहे.
या दोन दिवसांच्या मंथनातून जिल्ह्याच्या सर्वांगीण विकासाचा मसुदा तयार करून २६ ऑगस्ट रोजी गडचिरोली जिल्हा निर्मिती दिनाच्या निमित्ताने राज्य शासनाकडे सादर करण्यात येणार आहे, अशी माहिती डॉ. होळी यांनी दिली.
बांबू, लघुवनोपज आणि कृषीआधारित उद्योगांना चालना
गडचिरोलीतील बांबू, लघुवनोपज, कृषी उत्पादन आणि वनसंपत्तीवर आधारित उद्योगांना मोठी संधी आहे. या संसाधनांमध्ये मूल्यवर्धन करून कृषी प्रक्रिया उद्योग व पर्यटनाला चालना देत स्थानिक पातळीवर मोठ्या प्रमाणात रोजगारनिर्मिती करण्याची गरज असल्याचे डॉ. होळी यांनी स्पष्ट केले.
युवकांचे स्थलांतर रोखण्यासाठी कौशल्य विकास, आधुनिक तंत्रज्ञान, उद्योग आणि कृषी क्षेत्रासाठी आर्थिक सहाय्य तसेच स्थानिक पातळीवर रोजगार उपलब्ध करून देणे आवश्यक आहे. त्याचबरोबर महिला बचत गटांचे सक्षमीकरण, शेतकरी उत्पादक कंपन्यांना प्रोत्साहन, कृषी व वनाधारित उद्योगांचा विस्तार यावरही भर देण्यात येणार आहे.
दुर्गम गावांपर्यंत मूलभूत सुविधा पोहोचविण्याचा निर्धार
जिल्ह्यातील अनेक दुर्गम गावांमध्ये आजही रस्ते, आरोग्य, शिक्षण, इंटरनेट, वाहतूक, रोजगार आणि बाजारपेठेपर्यंत पोहोचण्याच्या सुविधा अपुऱ्या आहेत. त्यामुळे मूलभूत सुविधा मजबूत करण्याबरोबरच शिक्षण व आरोग्याचा दर्जा सुधारणे आणि दुर्गम भागातील नागरिकांना विकासाच्या मुख्य प्रवाहात आणणे आवश्यक असल्याचे सांगण्यात आले.
शासन, उद्योग, स्वयंसेवी संस्था आणि स्थानिक समाज यांच्या समन्वयातून जिल्ह्याच्या विकासाला गती देण्याचा प्रयत्न केला जाणार आहे. डिजिटल सेवांचा विकास करून ग्रामीण व दुर्गम भागातील नागरिकांपर्यंत आधुनिक सुविधा पोहोचविण्यावरही भर दिला जाणार आहे.
शेतीपासून पर्यटनापर्यंत सर्व क्षेत्रांचा समावेश
‘व्हिजन गडचिरोली’मध्ये शेती, उद्योग, शिक्षण, आरोग्य, पर्यटन, पर्यावरण, डिजिटल सेवा आणि आदिवासी विकास या सर्व क्षेत्रांचा समावेश केला जाणार आहे. प्रत्येक विभागासाठी निश्चित उद्दिष्टे ठरवून त्यानुसार कृती आराखडा तयार करण्याचा प्रयत्न केला जाणार आहे.
गडचिरोलीच्या नैसर्गिक व सांस्कृतिक वारशाचे संरक्षण करताना रोजगाराच्या नव्या संधी निर्माण करणे, स्थानिक अर्थव्यवस्था मजबूत करणे आणि जिल्ह्याला आत्मनिर्भर बनविणे हा या उपक्रमाचा मुख्य उद्देश असल्याचे डॉ. होळी यांनी सांगितले.
२०४७ पर्यंतचा दीर्घकालीन विकास आराखडा
‘व्हिजन गडचिरोली’अंतर्गत २०४७ पर्यंतचा दीर्घकालीन विकास आराखडा तयार करण्याची संकल्पना आहे. शेती, उद्योग, शिक्षण, आरोग्य, पर्यटन, पर्यावरण, डिजिटल सेवा आणि आदिवासी विकासासाठी निश्चित उद्दिष्टे ठरवून प्रत्येक विभागासाठी कृती आराखडा तयार केला जाणार आहे.
या प्रक्रियेत सर्व जाती-धर्म आणि समाजातील विविध घटकांचा समावेश असलेली सर्वसमावेशक कृती समिती २६ ऑगस्ट रोजी स्थापन करण्यात येणार आहे. या समितीच्या माध्यमातून जिल्ह्याच्या विकासासाठी लोकसहभागातून ठोस दिशा निश्चित केली जाणार आहे.
आश्रमशाळांतील सुविधांवरही उपस्थित केला सवाल
दरम्यान, पत्रकार परिषदेत जिल्ह्यातील आश्रमशाळांमध्ये उपलब्ध सुविधांबाबतही प्रश्न उपस्थित करण्यात आला. आश्रमशाळांमध्ये पुरेसे बेड उपलब्ध आहेत का? असा सवाल उपस्थित करत जवळपास सर्वच आश्रमशाळांमध्ये सुविधांची परिस्थिती सारखीच असल्याचे माजी आमदार डॉ. होळी यांनी निदर्शनास आणून दिले.
‘व्हिजन गडचिरोली’च्या माध्यमातून केवळ कागदावरील विकास आराखडा न बनवता स्थानिक नागरिकांच्या गरजा, नैसर्गिक साधनसंपत्ती, रोजगार, शिक्षण, आरोग्य आणि मूलभूत सुविधांचा प्रत्यक्ष विचार करून विकासाची दिशा ठरविण्याचा प्रयत्न केला जाणार आहे.
पत्रकार परिषदेला प्रमोद पिपरे, डॉ. उंदीरवाडे, ॲड. कविता माहोरकर यांच्यासह मान्यवर उपस्थित होते.
MEDIA VNI :
स्थानिक प्रश्नांपासून जिल्ह्याच्या विकासाच्या दिशेपर्यंत — प्रत्येक बातमी तुमच्यापर्यंत..!
#गडचिरोली #Gadchiroli #Maharashtra #India #MediaVNI
