दि. १५.०२.२०२३
Explosives seized by police : नक्षल्यांनी पुरलेली स्फोटके पोलिसांनी केली जप्त
विदर्भ न्यूज इंडिया
गडचिरोली : नक्षलवादी शासनविरोधी विविध घातपाती कारवाया करण्यासाठी विविध प्रकारचे शस्त्र व स्फोटक साहित्याचा वापर करतात व ते साहित्य सुरक्षा दलांना धोका पोहचविण्याच्या उद्देशाने गोपनीयरित्या जंगल परिसरात जमिनीमध्ये पुरून ठेवतात.
अशाच प्रकारे पुरून ठेवलेले नक्षल्यांचे स्फोटक साहित्य पोलिसांनी जप्त केले.
मंगळवार (ता. १४) ११ : ३० वाजताच्या दरम्यान उपविभाग धानोरा अंतर्गत येत असलेल्या पोलिस मदत केंद्राच्या कटेहारी हद्दीमध्ये कटेझरी-चारवाही जंगल परिसरात नक्षलवाद्यांनी पोलिस पथकांना मोठा घातपात घडवून आणण्याच्या उद्देशाने मोठ्या प्रमाणात स्फोटके व इतर साहित्य पुरून ठेवल्याची माहिती मिळाली.
त्या माहितीच्या आधारे गडचिरोली पोलिस दलाचे जवान व बीडीडीएस पथकाचे जवान नक्षलविरोधी अभियान राबवित असताना जवानांना जंगलात एका संशयित ठिकाणी लपवून ठेवलेले स्फोटके व इतर साहित्यांचा साठा आढळला.
त्या साठ्यामध्ये २ नग जिवंत ग्रेनेड, २ नग ग्रेनेड फायर कफ, १८ नग वायर बंडल, ५ ब्लास्टींग स्टिल डब्बे, १ प्लास्टिक डब्बा (टुल किटसह), ४ नग वायर कटर, ७ नग ग्रेनेड माऊंटींग प्लेट, १ नग लहान लोखंडी आरी, २० नग नक्षल पुस्तके, ७ टू-पीन सॉकेट, १ स्टील डब्बा झाकणी व २ नग प्लास्टीक झिल्ली आदी नक्षल साहित्य हस्तगत करण्यात आले.
२ नग ग्रेनेड हे बीडीडीएस पथकाच्या मदतीने अत्यंत सतर्कतेने जागेवर नष्ट करण्यात आले असून, घटनास्थळावर मिळालेल्या मुद्देमालावर कायदेशीर कारवाई करण्यात आली आहे. गडचिरोली पोलिस दलाकडून पुढील कारवाई सुरू आहे.
ही कारवाई पोलिस अधीक्षक नीलोत्पल, अप्पर पोलिस अधीक्षक (अभियान) अनुज तारे, अप्पर पोलिस अधीक्षक (प्रशासन) कुमार चिंता व अपर पोलिस अधीक्षक (अहेरी) यतीश देशमुख यांच्या मार्गदर्शनात तसेच उपविभागीय पोलिस अधिकारी स्वप्नील जाधव यांच्या नेतृत्वात पोलिस मदत केंद्र कटेझरीच्या जवानांनी पार पाडली. पोलिस अधीक्षक नीलोत्पल यांनी अभियानात सहभागी जवानांचे कौतुक केले. तसेच नक्षलविरोधी अभियान आणखी तीव्र करण्याचे संकेत दिले असून नक्षलवाद्यांनी नक्षलवादाची हिंसक वाट सोडून आत्मसमर्पण करून सन्मानाने जीवन जगण्याचे आवाहन केले आहे.
