दि. 06.08.2023
Pune Crime: धक्कादायक ! चित्रपटात कामाचे आमिष देत नृत्यशिक्षकाचा विद्यार्थिनीवर अत्याचार
मीडिया वी.एन.आय :
पुणे : शिक्षणाची पंढरी म्हणून ओळख असलेल्या पुण्यात धक्कादायक प्रकार उघडकीस आला आहे. या ठिकाणी गुरु-शिष्य परंपरेला काळीमा फासत नृत्यशिक्षकाने 15 वर्षीय विद्यार्थिनीवर अत्याचार केला.
चित्रपटामध्ये अभिनेत्री म्हणून कामाची संधी देण्याचे आमिष दाखवून नराधमाने हे कृत्य केले. या प्रकरणी हडपसर पोलीस स्टेशनला बलात्कार व पोस्को अंतर्गत गुन्हा दाखल करण्यात आला आहे.
सुशील राजेंद्र कदम असे आरोपीचे नाव असून तो मांजरी बुद्रुक येथील गोपाळपट्टी, यशोप्रभा सोसायटी शेजारी राहतो. तो हडपसर काळेपडळ येथील एका डान्स अकॅडमीमध्ये नृत्य शिकवत होता. याच डान्स अकॅडमीमध्ये पीडित 15 वर्षीय विद्यार्थिनी नृत्य शिकत होती. दरम्यान, आरोपी नृत्यशिक्षक सुशीलने चित्रपट क्षेत्रात आपली ओळख असल्याचे भासवत पीडित विद्यार्थिनीचा विश्वास संपादन करत तिच्याशी जवळीक साधली. त्यानंतर पीडित विद्यार्थिनीला चित्रपटात काम मिळवून देण्याचे आमिष दाखवले आणि तिला वेगवेगळ्या ठिकाणी नेत अत्याचार केला. याबाबत कोणाला सांगितल्यास आई-वडिलांना ठार मारण्याची धमकीही सुशील राजेंद्र कदम याने विद्यार्थिनीला देत अनेकवेळा अत्याचार केले.
आईने पाठलाग करुन पकडले
दरम्यान, मुलीचे कोणीतरी शोषण करत असल्याचा मुलीच्या आईला संशय आल्याने तिने पाठलाग करून शहरातील एका लॉजवर या दोघांना पकडले असता, हा प्रकार समोर आला. या प्रकरणी 15 वर्षीय पीडित विद्यार्थिनीने हडपसर पोलीस स्टेशनला तक्रार दिली. त्यानुसार आरोपीविरोधात अत्याचारसह बाललैंगिक अत्याचार प्रतिबंधक कायद्यांतर्गत गुन्हा दाखल करण्यात आला आहे. हडपसर पोलिसांनी तत्काळ आरोपी सुशील राजेंद्र कदम याला अटक केली आहे. या प्रकरणी पुढील तपास सहाय्यक पोलीस निरीक्षक प्रवीण अबदगिरी करीत आहेत.
दरम्यान, पुण्यात महिला तसेच अल्पवयीन मुलींवर अत्याचाराच्या घटना वाढीस आल्या आहे. वाढत्या गुन्हेगारीमुळे नागरिकांमध्ये भितीचे वातावरण आहे. हा सर्व प्रकार लक्षात घेता गुन्हेगारीला आळा घालण्यासाठी ठोस उपाययोजना करण्यात याव्यात अशी मागणी होत आहे.
