दि. 28 जुलै 2024
महाराष्ट्राचे नवे राज्यपाल सी.पी राधाकृष्णन, कोण आहेत.? जाणून घ्या त्यांची राजकीय कारकीर्द.!
Maharashtra New Governor : मीडिया वी.एन.आय :
मुबंई : राष्ट्रपती द्रौपदी मुर्मू यांनी झारखंडचे राज्यपाल सी पी राधाकृष्णन यांची महाराष्ट्राच्या राज्यपालपदी नियुक्ती केली आहे. तसेच इतरही अनेक राज्यांच्या राज्यपालांची घोषणा केली आहे, तर काही ठिकाणी नवीन राज्यपालांची नियुक्ती केली आहे.
आज आपण महाराष्ट्राचे नवे राज्यपाल सी पी राधाकृष्णन हे कोण आहेत? त्यांची राजकीय कारकीर्द कशी आहे याबाबत सविस्तर माहिती जाणून घेऊयात.
सी पी राधाकृष्णन यांची कारकीर्द
सीपी राधाकृष्णन हे तामिळनाडूतील भाजपचे ज्येष्ठ नेते आणि झारखंडचे विद्यमान राज्यपाल आहेत. राधाकृष्णन हे दक्षिण भारतातील भाजपच्या सर्वात ज्येष्ठ नेत्यांपैकी एक आहेत. सीपी राधाकृष्णन यांचा जन्म 20 ऑक्टोबर 1957 रोजी तामिळनाडूच्या तिरुपूर जिल्ह्यात एका सामान्य कुटुंबात झाला. वयाच्या 16 व्या वर्षी म्हणजेच 1973 मध्ये त्यांनी RSS मध्ये प्रवेश केला. नंतर ते जनसंघात दाखल झाले आणि सक्रिय राजकारणात आले. त्यांचे शिक्षण तुतीकोरीनच्या व्हीओसी कॉलेजमध्ये झाले.
दोनदा खासदार
1998 च्या कोईम्बतूर बॉम्बस्फोटानंतर, त्यांनी कोईम्बतूर लोकसभा मतदारसंघातून दोनदा निवडणूक जिंकली. 1998 मध्ये ते दीड लाखांहून अधिक मतांनी विजयी झाले होते. तर 1999 मध्ये ते 55 हजारांहून अधिक मतांनी विजयी झाले होते. त्यांची कौटुंबिक पार्श्वभूमी शेतकरी कुटुंबाची होती, त्यामुळे मतदारांनी त्यांच्यावर विश्वास दाखवला होता.
तमिळनाडूचे भाजपचे प्रदेशाध्यक्ष
सीपी राधाकृष्णन हे तमिळनाडूचे भाजपचे प्रदेशाध्यक्षही होते. तसेच पक्षनेतृत्वाने त्यांना केरळचे प्रभारीही बनवले होते. राधाकृष्णन हे 2016 ते 2019 पर्यंत ऑल इंडिया कॉयर बोर्डाचे अध्यक्ष होते. 2004 आणि 2019 च्या लोकसभा निवडणुकीत त्यांनी कोईम्बतूर लोकसभा मतदारसंघातून भाजपकडून उमेदवारी देण्यात आली होती, मात्र त्यांचा पराभव झाला होता.
सीपी राधाकृष्णन यांची दक्षिण भारतातील भाजपच्या प्रमुख नेत्यांमध्ये गणना केली जाते. तामिळनाडू आणि केरळसह इतर दक्षिणेकडील राज्यांमध्ये पक्ष संघटना मजबूत करण्यात त्यांचा मोठा वाटा होता. गेल्या पाच दशकांपासून ते आरएसएस, जनसंघ आणि भाजपशी जोडलेले आहेत. त्यांच्या राजकीय अनुभवाची दखल घेत त्यांना 2023 साली झारखंडचे राज्यपाल बनवण्यात आले होते. तमिलिसाई सुंदरराजन यांच्या राजीनाम्यानंतर 19 मार्च 2024 पासून त्यांच्याकडे तेलंगणाच्या राज्यपालपदाचा अतिरिक्त कार्यभार देण्यात आला होता. आता ते महाराष्ट्राचे राज्यपालपद सांभाळणार आहेत.
Who is CP Radhakrishnan, the new Governor of Maharashtra? Know his political career.
#MaharashtraNews #maharshtra #Mumbai #india #MediaVNI #Government #governor
#maratinews
