दि. ७ फेब्रुवारी २०२३
गडचिरोली पोलीस दलातर्फे आयोजीत '५ मार्च' महा-मॅरेथॉन - २०२३ च्या लोगोचे अनावरण
विदर्भ न्यूज इंडिया
गडचिरोली : पोलीस दलातर्फे गडचिरोली जिल्ह्यातील दुर्गम अतिदुर्गम भागातील आदिवासी तरुण युवक- युवतींना स्पर्धेच्या माध्यमातून एक संधी निर्माण वावी, तसेच आदिवासी भागात विकास व्हावा यासाठी सामाजिक बांधीलकीच्या दृष्टीने ०५ मार्च २०२३ रोजी भव्य मॅरेथॉन स्पर्धेचे आयोजन करण्यात आले आहे. या भव्य मॅरेथॉन स्पर्धेच्या लोगोचे अनावरण ०६ फेब्रुवारी २०२३ पोलीस अधीक्षक कार्यालय, गडचिरोली येथे पोलीस अधीक्षक नीलोत्पल, अपर पोलीस अधीक्षक (प्रशासन) कुमार चिंता, उपविभागीय पोलीस अधीकारी गडचिरोली, प्रणिल गिल्डा यांच्या हस्ते करण्यात आले.
या भव्य मॅरेथॉन स्पर्धेत समाजाच्या सर्व स्तरातून आबाल वृद्धांच्या सुमारे १०,००० हजार नागरिकांचा सहभाग अपेक्षित आहे.
स्पर्धेत सहभागी होऊ इच्छिणाऱ्यांनी आपल्या जवळच्या उपविभागीय पोलीस अधिकारी कार्यालय, पोस्टे उपपोस्टे / पोमके येथे संपर्क साधावा. या मॅरेथॉन स्पर्धेची नोंदणी मोफत असणार आहे. त्यामुळे गडचिरोली जिल्ह्यातील नागरिकांनी अधिकाधिक संख्येने सहभागी व्हावे असे आवाहन गडचिरोली पोलीस दलातर्फे करण्यात आले आहे. तसेच सदरच्या मॅरेथॉन स्पर्धेची तयारी व व्यवस्था उपविभागीय पोलीस अधिकारी गडचिरोली, प्रणिल गिल्डा पाहत आहेत.
